Mii ohcat dáiddalaš jođiheaddji guhte ovttas minguin háliida viidáseabbut ovdánahttit sámi lávdedáidaga. Áiggis mas servodat rievddada, gielat revitaliserejuvvojit ja riikkaidgaskaš fuomášupmi lassána, lea teáhteris dehálaš rolla – dáiddalaččat, institušuvnnalaččat ja politihkalaččat.
Dál mii ohcat jođiheaddji geas lea nanu dáiddalaš višuvdna ja máhttu ovdánahttit teáhtera ovttas bargiiguin, stivrrain ja ovttasbargoguimmiiguin.
Giron Sámi Teáhter
Giron Sámi Teáhter lea sámi álbmoga teáhter ja dehálaš olles Ruŧŧii. Teáhterii lea Dálvadis friddja teáhterjoavku vuođđun ja dat lea 1990-logu álggu rájis buvttadan professionála lávdedáidaga sámi kultuvrra, identitehta ja sámi gielaid vuođul.
Teáhter buvttada ja johtá lávdedáidagiin olles Sámis ja muđui Davviriikkain. Buvttadeamit leat mánáid, nuoraid ja rávisolbmuid várás ja buktojuvvojit ovdan sámegielaide ja ruoŧagillii. GST lea dehálaš čájáhalli kulturpolitihkalaš oktavuođain; báikkálaččat, guovlluguovdasaččat, našuvnnalaččat ja riikkaidgaskasaččat.
Lávdedáidaga, semináraid ja ovttasbargguid bokte, Giron Sámi Teáhter doaibmá dáiddalaš ovdáneami, giellarevitaliserema ja ealli almmolaš ságastallama ovddas.
Teáhtera ruhtadit Kulturdepartemeanta Sámedikki bokte, Region Norrbotten, Region Västerbotten ja Giron ja Luspien gielddat.
Dehálaš ovdánahttináigi
Teáhter lea 2017 rájis árjjalaččat bargan ásahit boahtteáigásaš sámi našunálalávddi stáhtalaš ruhtademiin. Bargu siskkilda dáiddalaš ovdáneami, organisatuvrralaš stáđisvuođa, guhkesáigásaš ovttasbargguid ja doallevaš buvttadanhámiid.
Gironis lea historjjálaš gávpotsirdin jođus mii váikkuha teáhtera boahtteáigásaš lanjaide ja bargovugiide. Dát mielddisbuktá sihke hástalusaid ja vejolašvuođaid ja gáibida ođđajurddašeami, fleksibilitehta ja dáiddalaš ovdáneami.
Dáiddalaš jođiheaddjin dus lea guovddáš rolla hábmet teáhtera boahtteáigásaš barggu ja veahkehit nannet sámi lávdedáidaga báikkálaččat, našuvnnalaččat ja riikkaidgaskasaččat.
Rolla birra
Don jođihat barggu buvttademiiguin, dáiddalaš proseassaiguin ja ovttasbargoguimmiiguin ja doaimmat nannet teáhtera rolla njunuš sámi lávdedáiddainstitušuvdnan.
Rollii gullá:
- ovdánahttit teáhtera dáiddalaš profiilla ja buvttademiid,
- vuolggahit ja jođihit dáiddalaš buvttademiid ja ovttasbargguid,
- veahkehit ovdánahttit ođđa sámi muitalusaid ja lávdehámiid,
- nannet teáhtera relašuvnnaid dáiddačehpiiguin, institušuvnnaiguin ja fierpmádagaiguin Sámis ja riikkaidgaskasaččat,
- ovddastit teáhtera almmolaš ja kulturpolitihkalaš oktavuođain,
- váldit ovdan višuvnnaid, gulahallat ja hukset relašuvnnaid,
- ja veahkehit barggus ásahit boahtteáigásaš sámi našunálalávddi.
Hálddahuslaš ja organisatuvrralaš bargu čađahuvvo lagas ovttasbarggus teáhtera eará bargiiguin ja stivrrain.
Du profiila
Mii ohcat du guhte leat oadjebas ja movttiidahtti jođiheaddji nanu dáiddalaš integritehtain ja buriiguin ovttasbargoattáldagaiguin.
Mii háliidit ahte dus lea dokumenterejuvvon hárjáneapmi:
- sámi kultuvrras, sámi gielain ja sámi servodatjearaldagain,
- dáiddalaš barggus lávdedáidagis,
- váldit ovdan višuvnnaid, leahkit kommunikatiivvalaš ja hukset relašuvnnaid,
- jođihit kreatiiva proseassaid ja ovttasbargguid,
- ja buorit hupman- ja čállinmáhtut ruoŧagielas dahje eará skandinávalaš gielas.
Lea ánsun jus dus:
- lea hárjáneapmi bargat institušuvnnalaš lávdedáidagiin,
- leat fierpmádagat teáhter- ja kultursuorggis, erenoamážit Sámis ja eamiálbmotsuorggis
- lea hárjáneapmi ja loavttát doaimmas gos dáidda, servodat ja kulturpolitihka deaivvadit.
Praktihkalaš dieđut
Virgi lea áigeráddjejuvvon ollesáigevirgi mas lea bargobáiki Gironis ja vejolašvuohta guhkideapmái. Álgin soahpamuša vuođul, muhto maŋimusat ođđajagimánu 1 beaivvi 2027.
Válljen ja jearahallamat dahkkojit jotkkolaččat.
Ohcamuš oktan CV:in ja persovnnalaš reivviin sáddejuvvojit dása rekrytering@samiteahter.org.
Jearaldagaide virggi birra vástideaba:
Michael Lindblad, sadjásaš teáhterhoavda, michael@samiteahter.org, + 46 (0)70 367 40 43
Tomas Bokstad, sadjásaš bargiidovddasvástideaddji, tomas@samiteahter.org, +46 (0)70 585 84 05
Maŋimus ohcanbeaivemearri: borgemánu 12 beaivvi 2026
/
